အမေ နောက်တကြိမ်နွေရောက်ပြန်ပြီတဲ့အမေ ဒီမှာတော့နွေရောက်ပေမဲ့ အေးနေဆဲပါပဲအမေ အအေးကြိုက်တာချင်းတူတဲ့ အမေနဲ့သမီးဟာ ခေါင်းမာတာ စိတ်မာတာပါတူပြီး တခုခုဆို ဝမ်းနည်းလွယ်တာကတော့ အဖေ့အမွေပေါ့ အမေ အခုရက်ပိုင်းမှာ ကျောင်းကပိတ်သွားပြီး အတိုက်အခိုက် အထိုးအနှက်တွေနဲ့ဆိုတော့ အားတော့ငယ်မိတယ်အမေ အမေဟာစာဖတ်ဝါသနာပါသူမို့ သမီးတို့ကိုလဲ တိုင်းရင်းမေ မြဝတီ မြတ်မင်္ဂလာ ငွေတာရီမဂ္ဂဇင်းတွေနဲ့ ကြီးပြင်းစေခဲ့တဲ့အမေ ကြီးလာတော့လဲ ကလျာ မိုးမိုး အင်းလျား မဟူရာ နေနွယ်ဇင်မြင့် လမင်းမိုမို မဟူရာ ရှား လယ်တွင်းသားစောချစ် မင်းသိင်္ခတို့နဲ့နေစေတဲ့အမေ အမေပြောခဲ့တာလေး သတိရတယ်အမေ သူများရွံ့နဲ့ထုဖို့ ကိုယ့်လက်အရင် ရွံ့ပေမှာမို့ အပေမခံနဲ့တဲ့ ဟုတ်ပါတယ်အမေ အမေ့မှာစကား နားထောင်ရင်း လက် အပေမခံတော့ပါဘူးအမေ ပြီးတော့ သူများထက် အလုပ်များများလုပ်ရင် အမှားများများတွေ့ပြီး များများအပြောခံရမယ်တဲ့ နည်းနည်းလုပ်ရင် နည်းနည်းပဲတွေ့ပြီး နည်းနည်းပဲ အပြောခံရမယ်တဲ့ အပြောခံလွတ်သူဆိုတာမရှိတာမို့ ခံနိုရည်ရှိဖို့ထက် ဥပေက္ခာပြုနိုင်ဖို့ တွေးပါတဲ့ ဟုတ်တယ်အမေ ဘာမှမခံစားပဲ ဖြစ်တတ်တာပဲ ပြောကြမှာပဲလို့ တွေးလိုက်ပါတယ်အမေ နောက်တခု အမေ မကြိုက်တာ မကြားလိုတဲ့စကားက မိမဆုံးမ ဖမဆုံးမ ဆိုတဲ့စကား နားခါးသတဲ့ သားသမီးရဲ့အပြုအမူ အပြောအဆိုတစ်ခုဟာ အခြားလူအတွက် စိတ်အနှောက်အယှက်ဖြစ်စေရင် ထိခိုက်စေရင် အမိမဆုံးမလို့ အပြောခံရမယ်တဲ့ ပါးစပ်ကတင်မဟုတ် လက်ပါ ပါတတ်ရင် အဖ မဆုံးမလို့တဲ့ အာ့ကြောင့် အာ့မျိုးစကား ဘယ်တော့မှ မကြားလိုဘူးတဲ့ အမေပြောခဲ့ဖူးတဲ့ စကားတွေဟာ သမီးအတွက် မမေ့စရာတွေပါအမေ တိုက်ဆိုင်တာတခုခုကြုံတိုင်း ဪ...အမေပြောခဲ့တာတွေ အကုန်မှန်တာပဲ ဪ...ဒါကဖြစ်တတ်တဲ့ သဘာ၀ပဲ လို့တွေးလိုက်တာ ခံစားချက်ကို လျော့ပါးစေပါတယ်အမေ ညီးကိုက စိတ်ကမြန်နေတာ ထစ်ကနဲဆို ဒေါသထွက်တာ ထစ်ကနဲဆို မခံချင်စိတ်နဲ့တုန့်ပြန်တတ်တာ မကောင်းတာမို့ ပြင်ပါသမီးရယ်တဲ့ အမေရေ အဲ့စိတ်က originalစိတ်ဖြစ်လို့ ပြင်မရပေမဲ့ ဥပေက္ခာတော့ နည်းနည်းပြုနိုင်ပါပြီအမေ ညီးကိုခွေးကိုက်ရင် ခွေးကို ညီးပြန်ကိုက်မှာလားတဲ့ မကိုက်ပါဘူး ထုမှာပေါ့လို့ ပြန်ပြောခဲ့တော့ ထုရင် ခွေးကို မှန်မှာသေချာလား ခွေးနာသွားမှာသေချာလားတဲ့ အာ့တော့မသေချာဘူးပေါ့ဗျ လို့ပြန်ပြောတော့ အေး မသေချာရင် ကိုက်တတ်တဲ့ ရန်လိုနေတဲ့ခွေးတွေရှိတဲ့ နေရာတွေကနေ ဖြတ်မသွားနဲ့ ဝေးဝေးနေတဲ့ အဟုတ်ပဲအမေ အာ့ကြောင့် အခု ဒီအရပ်ဒေသကနေ စွန့်ခွာဖို့ ဆုံးဖြတ်လိုက်ပါပြီအမေ အမေရေ စိတ်ငြိမ်းချမ်းနေတဲ့ အမေက မငြိမ်းချမ်းနိုင်သေးတဲ့ သမီးကို အတိုက်အခံ အထိုးအနှက်များနဲ့ ကြီးပြင်းခဲ့ရတဲ့သမီးကို စိန်ခေါ်မှုတွေနဲ့ အမြဲchallengeလုပ်နေရတဲ့သမီးမို့ စိတ်မချနိုင်တာ သမီးသိပါတယ်အမေ အခု.. သမီးလေ ဒီလေးနှစ်မှာ နေရာစုံ ဘ၀စုံ လူစုံကြုံတွေ့နေရတာမို့ အမေ့စကားတွေကို လိုက်နာရင်း အမေ့ကို အောက်မေ့သတိရရင်း ကိုယ့်စိတ်ကို အေးချမ်းအောင် ဥပေက္ခာပြုနိုင်အောင်ကြိုးစား တည်ဆောက်နေပါပြီအမေ ကောင်းတဲ့အမွေတွေ ပေးခဲ့တဲ့အမေရေ ကောင်းရာဘ၀ရောက်နေမှာမို့ ကျေးဇူးပါအမေ 🙏🙏🙏🙏🙏 ခင်နှင်းဆီ