မိတ္ထီလာတွင် အုပ်ချုပ်ရေးမှူးနှင့် ထွေအုပ်စာရေး ရုံးအုပ်ကြီးတို့ ရက်ပိုင်းပဲခြားကာ လက်သည်မပေါ်ဘဲ ပစ်ခတ်ရှင်းလင်းခံရ ဖေဖော်ဝါရီ ၂၈၊ ၂၀၂၅ မန္တလေးတိုင်း၊ မိတ္ထီလာမြို့နယ်မှာ စစ်ကောင်စီခန့်အုပ်ချုပ်ရေးမှူး ၁ယောက် ပစ်ခတ်ရှင်းလင်းခံရပြီးရက်ပိုင်းအကြာမှာပဲ ထွေအုပ်ရုံးက ရုံးအုပ်ကြီး မြင့်အေး ဆိုသူ ထပ်မံပစ်ခတ်ရှင်းလင်းခံရကာ သေဆုံးသွားကြောင်း သိရပါတယ်။ ဖေဖော်ဝါရီ ၂၇ရက်၊ မနေ့ကမနက်ပိုင်းမှာ မိတ္ထီလာမြို့နယ်၊ အထွေထွေအုပ်ချုပ်ရေးမှူးဦးစီးဌာနက ဌာနခွဲစာရေးဖြစ်သူ ရုံးအုပ်ကြီးမြင့်အေးဟာ နေအိမ်ကနေ ရုံးတက်ဖို့ ထွက်လာချိန်မှာ မိတ္ထီလာ- မြင်းခြံလမ်းပိုင်း၊ မိုင်တိုင် အမှတ် ၉/၄​ နဲ့ ၉/ ၅အတွင်း သေနတ်နဲ့ ပစ်ခတ်ရှင်းလင်းခံခဲ့ရတာလို့ သိရပါတယ်။ "ဒီလူက တော်တော်ဆိုးတဲ့လူဗျ။ လူငယ်တွေစစ်မှုထမ်းဖို့နဲ့ ဖမ်းခံရတဲ့ကိစ္စတွေမှာ အဓိက ပတ်သက်နေတဲ့သူပါ။ အဲ့ဒါ ဒီနေ့မနက် ၉နာရီလောက်မှာ ရေချိုကွာကနေ ရုံးကို အလာမှာ ပစ်ခံရတာ" လို့ ဒေသခံ ပြည်သူ၁ယောက်က မောင်းကိုပြောပါတယ်။ ပြီးခဲ့တဲ့ ဖေဖော်ဝါရီလ ၂၅ရက်နေ့ကလည်း စစ်ကောင်စီအတွက် စစ်သားသစ်စုဆောင်းပေးရာကနေ အုပ်ချုပ်ရေးမှူးဖြစ်လာတဲ့ စည်းခုံကြီးအုပ်ချုပ်ရေးမှူး ဇော်မင်းဦး ဆိုသူကို ပခုက္ကူတိုက်တန်း၊ စည်းခုံကြီး၊ လက်ဖက်ရည်ဆိုင်အတွင်း လက်နက်ကိုင်လူတစ်စုက ဝင်ရောက်ပစ်ခတ်ရှင်းလင်းခဲ့ပါသေးတယ်။ ဇော်မင်းဦး ပစ်ခတ်ရှင်းလင်းခံရပြီးတဲ့နောက်မှာတော့ စစ်ကောင်စီက မိတ္ထီလာမြို့နေလူငယ်၊ လူရွယ် အယောက် ၆၀နီးပါးကို မတရား ဖမ်းဆီးခဲ့တယ်လို့ သိရပါတယ်။ ဒီပစ်ခတ်ရှင်းလင်းမှုတွေကိုလုပ်ဆောင်ခဲ့တဲ့ သက်ဆိုင်ရာအဖွဲ့စည်းတွေကတော့ အခုချိန်အထိ တစုံတရာ ထုတ်ပြန်ထားခြင်း မရှိသေးပါဘူး။ ရှမ်းတဲလေတပ်စခန်းအပါအဝင်၊ ခြေမြန်တပ်မဌာနချုပ် တပ်မ(၉၉) တို့လို စစ်ဌာနချုပ်တွေတည်ရှိရာ မိတ္ထီလာမြို့နယ်မှာပါ အခုလို စစ်ကောင်စီဒေါက်တိုင်တွေ ဆက်တိုက်ဆိုသလို ရှင်းလင်းခံရမှုတွေ ဖြစ်ပေါ်လာတာကြောင့် စစ်ကောင်စီလက်အောက်ခံ ဝန်ထမ်းတွေကြား ကြောက်ရွံမှုတွေရှိလာပြီလို့လည်း တော်လှန်ရေးအင်အားစုတွေကသုံးသပ်ပါတယ်။ ပုံစာ - မိတ္ထီလာမြို့နယ်အတွင်း ပစ်ခတ်ရှင်းလင်းခံရသည့် စစ်ကောင်စီခန့်အုပ်ချုပ်ရေးမှူး ဇော်မင်းဦး နှင့် ထွေအုပ်ရုံးအုပ်ကြီး မြင့်အေး